Годишниот извештај на Обединетите нации, кој документира сексуално насилство во конфликти ширум светот, за првпат ги вклучи израелските сили откако започна ова следење пред повеќе од 15 години, поради третманот на палестинските затвореници. Израел ги негира обвинувањата, пренесува АП.
Извештајот од 35 страници — споделен од израелската мисија во ОН доцна во четвртокот, пред очекуваното официјално објавување во петок — наведува 77 владини и невладини страни во повеќе од десетина земји, осомничени за извршување или одговорност за сексуално насилство во конфликти низ светот.
Во извештајот се истакнува дека бројот на случаи значително се зголемил во 2025 година во споредба со 2024 година.
Руските вооружени и безбедносни сили исто така за првпат годинава се најдоа на листата, поради сексуално насилство врз воени заробеници и цивили приведени за време на војната во Украина.
На листата за 2025 година се вклучени и израелските сили, како и милитантите на Хамас, кои претходно беа ставени на листата по нападот на 7 октомври 2023 година врз Израел, што ја предизвика војната во Газа.
Претставниците на двете земји остро реагираа на нивното вклучување и упатија критики кон генералниот секретар на ОН, Антонио Гутереш.
Рускиот амбасадор во ОН, Василиј Небензја, изјави дека Русија ќе испрати писмо до генералниот секретар во кое обвинувањата ќе ги нарече „неосновани“. Тој додаде дека Русија подготвува извештај за третманот на руските воени заробеници од страна на Украина.
Израелскиот амбасадор во ОН, Дани Данон, изјави дека „Гутереш го ставил Израел на иста листа со Хамас, ИСИС и најлошите терористички организации во светот“.
Во извештајот се наведува дека ОН документирале „обрасци на сексуално насилство“ врз Палестинци притворени во Израел и на окупираните палестински територии, при што биле потврдени повеќе случаи што вклучуваат и употреба на сексуално насилство како форма на тортура.
Се споменуваат случаи на силување, вклучително и со предмети, физичко насилство врз гениталиите, присилно соблекување и закани со силување.
Израел и Русија категорично ги негираа обвинувањата и оценија дека тие се неосновани и политички мотивирани.