Комитетот за надворешна политика на Европскиот парламент го усвои годишниот извештај за Црна Гора, во кој земјата е оценета како најнапредна во процесот на пристапување кон Европската Унија.
Во извештајот се повикува на понатамошно зајакнување на независноста и ефикасноста на правосудниот систем, како и на постигнување одржливи резултати во борбата против висока корупција и организиран криминал.
Исто така се нагласува потребата од намалување на бројот на заостанати судски предмети и целосно усогласување на визната политика со Европската Унија.
Авторот на извештајот, европратеникот Марјан Шарец, предупреди дека Црна Гора ја очекува многу предизвикувачка година.
„Времето е ограничено, а работа сè уште има. Овој извештај треба да служи како признание за досегашниот напредок и како поттик за периодот што следи. Пред сè, треба да се сфати како повик до сите засегнати страни да покажат мудрост и одговорност, за малите несогласувања да не го засенат или оддалечат напредокот кон пошироките стратешки цели“, изјави Шарец по гласањето.
Извештајот ги повикува сите државни институции политичките разлики да не го забавуваат усвојувањето и спроведувањето на реформите поврзани со Европската Унија.
Се нагласува дека членството во ЕУ треба да остане заеднички национален приоритет над партиските интереси, а од парламентот и владата на Црна Гора се бара прашањата на идентитетот да не го одвлекуваат вниманието од европскиот процес.
Во документот се наведува дека, иако Црна Гора е најнапредната земја во процесот на интеграција и блиску до затворање на преговарачките поглавја, напредокот не зависи само од технички реформи, туку и од дневнополитичките случувања и внатрешните тензии кои често го забавуваат усогласувањето со стандардите на ЕУ.
Досега Црна Гора привремено затворила 14 од вкупно 33 преговарачки поглавја.
Целта на земјата е да ги затвори сите поглавја до крајот на оваа година, со што би се отворил патот за можен влез во ЕУ до крајот на 2028 година.
За успешно завршување на преговорите, се наведува во извештајот, клучно е зачувување на политичкиот консензус за европскиот пат и обезбедување конструктивна соработка меѓу владата и опозицијата.
Одржливи резултати во владеењето на правото и ефикасно спроведување на реформите се дефинирани како главни услови за затворање на поглавјата 23 и 24.
Минатиот месец Европската Унија донесе одлука за формирање работна група која ќе работи на изработка на нацрт-текстот на Договорот за пристапување со Црна Гора.
Од Црна Гора се очекува побрзо и потранспарентно именување на носителите на функции во правосудниот систем, вклучувајќи судии во Уставниот суд и членови на Судскиот и Обвинителскиот совет.
Исто така се нагласува потребата од натамошно усогласување на законодавството со стандардите на ЕУ, особено во однос на независноста и професионалноста на правосудството, како и намалување на бројот на нерешени предмети – особено во случаи на корупција и организиран криминал.
Во извештајот се изразува загриженост и за странски влијанија, дезинформации и хибридни закани, а од Црна Гора се бара дополнително зајакнување на отпорноста на институциите.
Документот ја оценува усогласеноста на надворешната и безбедносната политика на Црна Гора со политиката на Европската Унија.
По усвојувањето во Комитетот за надворешна политика на Европскиот парламент, извештајот се очекува да биде ставен на пленарно гласање во јуни, кога ќе добие форма на резолуција на оваа институција.