Лидерите на ВЛЕН, по свечената вечер по повод независноста на Косово во Приштина, одржале средба на која се разговарало за прашањето на изборот на лидер. Неофицијално се дознава дека средбата се одржала во присуство на премиерот Албин Курти. ТВ21 дознава дека на оваа средба на маса била разгледувана опцијата со ко-претседатели. Предложено било двајца претседатели да бидат Билал Касами и Изет Меџити, додека Беким Сали и Арбен Фетаи да бидат именувани за потпретседатели, а Беким Ќоку за генерален секретар.
Сепак, во рамки на ВЛЕН веќе се соочуваат со потешкотии во начинот на функционирање со повеќе одделни субјекти, па затоа се бара нов концепт за што поскоро спојување во една партија.
„Идејата е обединување, да станеме едно, што ние го нарекуваме спојување. Тоа значи откажување од индивидуалните партии. Значи да не зборуваме повеќе за БЕСА, ДД, Алтернатива, АА, туку да зборуваме за ВЛЕН, бидејќи гледаме дека станува тешко да се одржи овој модел“, вели Беким Ќоку.
Додека се зборува за обединување, од друга страна се дискутираат и формули за распределба на моќта меѓу партиите. Арбен Фетаи во понеделникот изјави дека во ВЛЕН треба да продолжи концептот на еднаквост од по 25% за секоја партија.
„Таму има неколку принципи. Првиот е еднаквоста на четирите субјекти, како што знаете делот на ВЛЕН се дели на четири четвртини“, вели Арбен Фетаи.
– Г-дин Ќоку, дали е реално Арбен Фетаи да бара 25% при распределбата на власта?
Беким Ќоку: Реално е да бара.
– Но дали му следува?
Б.Ќ.: Тоа е друго прашање. Јас велам дека ги дискутираме овие работи и ги избегнуваме овие проценти, каде може да се фатите за 1% или 2% за функции. Мислам дека ова треба да се надмине.
Ќоку зборуваше и за последните случувања во Движењето Беса. Тој нагласи дека Движењето Беса може да ја напушти Владата само ако ВЛЕН ја напушти Владата, додавајќи дека БЕСА е ВЛЕН, а ВЛЕН е Беса.