На граѓаните и понатаму им пристигнуваат СМС-пораки од сомнителни броеви со странски префикси за наводни сообраќајни прекршоци, повикувајќи се на системот „Safe City“. Многумина станале жртви на измама, вршејќи онлајн плаќања преку лажни системи од странски држави. Ова предизвика загриженост кај граѓаните, кои дури и кога се казнети од радар, казните ги плаќаат физички во полициските станици.
Но, министерот за внатрешни работи рече дека граѓаните не треба да одговараат на СМС-пораки што доаѓаат од странски префикси, бидејќи според Тошковски, од домашни броеви не можат да се случуваат вакви измами преку електронска комуникација.
„Сите напади што сме ги имале досега се случувале од странски држави, не може да има ваква измама од таканаречени ’фишинг‘ напади од домашни броеви. Ова е добар начин граѓаните на Македонија да ги препознаат овие лажни напади, нешто што се случува насекаде во светот. Тие што вршат измами бараат секој можен простор за кражба преку електронски комуникации“, изјави министерот за внатрешни работи, Панче Тошковски.
Од еден од приватните оператори велат дека немало поплаки од граѓани, додека во нашата редакција и на социјалните мрежи има бројни објави со СМС-пораки во кои се бараат лични и банкарски податоци за наводно плаќање на казна регистрирана од „Safe City“ во Македонија.
Сето ова беше кажано на кампањата за подигнување на свеста организирана од полицијата и мобилниот оператор „A1“ за безбедно управување со возила без користење електронски уреди, изјави директорот Методија Мирчев.
„Искрено, немаме информации дека се случиле такви случаи, но можеме да контактираме со нашиот тим што работи на оваа проблематика и ќе останеме во контакт. Искрено, немам информација дека до нашите корисници пристигнуваат вакви СМС-пораки. Имаме систем што го користиме за ваков вид ’фишинг‘ напади што беа спомнати, апсолутно треба да провериме бидејќи искрено немаме добиено такви поплаки од нашите корисници за ваков тип измами“, изјави Методија Мирчев, извршен директор на А1 Македонија.
Инаку, министерот Тошковски изјави дека системот „Safe City“ значително ќе се прошири и во иднина ќе опфаќа поширок спектар на сообраќајни прекршоци. Според него, системот повеќе нема да биде ограничен само на мерење брзина, поминување на црвено светло или истечена регистрација, туку ќе се користи и за утврдување други прекршоци како неправилно менување лента, неправилни вртења и непрописно паркирање. Дополнително, Тошковски најави построги контроли и казни за оние кои нелегално управуваат мотоцикли во пролетно-летниот период и се обидуваат да ги избегнат камерите на „Safe City“.