Летонците денеска избираат нов парламент, додека проукраинскиот премиер Андрис Кулбергс се обидува да освои цел мандат. Гласањето се одржува во време кога малата република на источниот раб на НАТО се соочува со зголемена загриженост поради потенцијална руска агресија.
Политичката криза во мај, предизвикана од начинот на кој властите се справија со залутаните дронови за кои се сомневаше дека потекнуваат од Украина, доведе до пад на владејачката коалиција, која и претходно беше под притисок поради повеќе прашања. Парламентот, односно Саеима, потоа одобри четирипартиска коалиција предводена од Кулбергс, од центристичката партија Обединета листа, која претходно беше во опозиција.
Летонија, како и нејзините балтички соседи Литванија и Естонија, силно ја поддржува Украина во нејзината борба против руската инвазија. Земјата се граничи и со Русија и со Белорусија, која е сојузник на Москва.
Кулбергс (47) сега бара сопствен мандат од гласачите, иако, како што велат аналитичарите, речиси сигурно ќе биде потребна повеќепартиска коалиција за формирање влада во политички фрагментираниот парламент. Партиите мора да освојат најмалку 5 отсто од гласовите за да добијат пратенички места.
Речиси 1,56 милиони луѓе од населението од повеќе од 1,8 милиони жители имаат право да ги изберат 100-те пратеници во еднодомниот парламент Саеима, со мандат од четири години.
Загриженоста од потенцијални руски хибридни напади – термин што се користи за неконвенционални непријателски активности, како саботажи, сајбернапади, дезинформации и низа други методи – во последните месеци расте во делови од Европа. Летонија, како и другите земји на источниот раб на НАТО, е особено изложена.
НАТО ја засили заштитата на воздушниот простор на Летонија за време на изборите, при што Германија испрати четири борбени авиони „Еурофајтер“ во Летонија на околу една недела.
Летонската Државна служба за безбедност минатата недела соопшти дека досега не открила значајни или систематски обиди од страна на Русија или други актери за влијание врз изборите во корист на која било партија или кандидат, објави новинската агенција ЛЕТА.