Македонецот Александар Волкановски со историска победа го одбележа вчерашниот настап во УФЦ, откако со нокаут во втората рунда го совлада дотогаш непоразениот Мовсар Евлоев на настанот УФЦ 333 во Абу Даби.
Волкановски, кој настапува за Австралија, но има македонско потекло, со оваа победа испиша нова страница во историјата на перолесната категорија. Тој стигна до деветтата победа во борби за титула, со што го надмина легендарниот Хозе Алдо, кој имаше осум такви триумфи.
Неговиот противник, Мовсар Евлоев, во октагонот влезе со импресивен биланс од 20 победи без ниту еден пораз. Рускиот борец важеше за сериозен предизвикувач, познат по одличната техника на борење и способноста да ги контролира противниците.
Во првата рунда Евлоев неколкупати успеа да го собори Волкановски и да ја наметне својата тактика. Сепак, македонскиот борец не се откажа од својата стратегија, а во втората рунда ја искористи шансата за решавачки напад и стигна до прекин на борбата со нокаут.
По триумфот, Волкановски со почит зборуваше за противникот, нагласувајќи дека знаел колку е квалитетен, но верувал во сопствените можности.
„Тој е одличен борец и со причина беше непоразен. Но, јас едноставно си реков дека сум вистинскиот човек за оваа работа. Имам само почит кон него, но добро е чувството кога ќе забележиш прекин“, изјави Волкановски по борбата.
Тој додаде дека и понатаму се натпреварува затоа што го сака тоа што го прави, а не затоа што чувствува обврска да продолжи.
Со вчерашниот триумф, Волкановски уште еднаш го потврди својот статус меѓу најголемите имиња во ММА, а неговото македонско потекло е дополнителна причина за гордост кај македонските љубители на боречките спортови.