Министерот за култура и туризам, Седат Сулејмани оствари средба со заменик-претседателката на Владата на Словачката Република и министерка за култура, Мартина Шимковичова, која престојува во официјална посета на нашата земја.
На состанокот разговарале за унапредување на односите меѓу двете земји, со посебен акцент на зајакнувањето на соработката во областа на културата и туризмот. Сулејмани и Шимковичова потпишаа нов договор за соработка во областа на културата.
„За време на средбата потпишавме нов Договор за соработка во областа на културата, кој создава можности за уметничка размена, заеднички проекти и нови партнерства меѓу културните институции од двете земји. Посебно внимание посветивме и на организирањето Денови на нашата култура во Словачка и Денови на словачката култура во нашата земја, како и на размената на искуства поврзани со Европската престолнина на културата, Тренчин 2026 и Скопје 2028. Верувам дека оваа средба и потпишаниот договор ќе дадат нов поттик на нашата соработка и ќе придонесат за натамошно зближување на двете земји“, објави министерот за култура и туризам Сулејмани.