Сите очи треба да се вперени во судската власт, нагласи премиерот Христијан Мицкоски во вчерашното гостување во емисијата „Клик плус“ на ТВ21, оценувајќи ги состојбите во правосудството и зборувајќи за враќање на довербата на граѓаните во институциите и правдата.
„Таму има многу чесни судии и обвинители. За жал, има неколкумина, коишто ги контаминираат чесните судии обвинители. Е, ние треба таму да се насочиме. Тие што ги контаминираат овие коишто се чесни судии и обвинители“, оцени тој.
Според Мицкоски, владата и парламентот не се местото каде што треба да се бара правда.
„Ако ние сме влада која што се однесува како претходната влада, носи закони за амнестија, злоупотребува европско знаме и така натаму – тогаш, да, во ред. И, таа цена ќе си ја платиме ние на избори. Но, еве ние велиме не – не сакаме да бидеме таква влада. Ние сакаме да обезбедиме предуслов да можат овие што треба да ја донесат правдата, тоа е судската власт, да ја донесат. И ние така се однесуваме“, рече Мицкоски.