Мозамбик соопшти дека пет негови државјани биле убиени во „ксенофобични напади“ во Јужна Африка за време на викендот, а властите во вторникот работеа на репатријација на стотици други лица.
Сепак, јужноафриканската полиција тврди дека во насилствата во крајбрежниот град Мосел Беј загинале само двајца државјани на Мозамбик. Ова се првите убиства кои официјално се поврзуваат со бранот антимигрантски протести што се шират низ оваа земја.
Според полицијата, во насилствата бил убиен и еден јужноафрикански тинејџер, додека има извештаи дека биле запалени десетици импровизирани живеалишта, при што во некои од нив имало луѓе.
Протестите против недокументирани странски државјани во Јужна Африка се интензивираат во последните недели. Поради тоа, Гана минатата недела евакуираше околу 300 свои државјани, а и Нигерија најави планови за репатријација.
Јужна Африка во изминатите децении повеќепати се соочуваше со бранови на ксенофобично насилство. Последното зголемување на тензиите доаѓа во период кога политичките партии се обидуваат да обезбедат поддршка пред локалните избори што треба да се одржат во ноември.
Во 2008 година, во антимигрантски немири беа убиени 62 лица, меѓу кои и 21 јужноафрикански државјанин, а илјадници луѓе беа раселени. Нови избувнувања на ваков тип на насилство беа регистрирани и во 2015 и 2016 година.