Муслиманските верници од сите возрасни групи, рано утрово ги наполнија џамиите на молитва за Курбан Бајрам.
Централната манифестација се одржа во џамијата Мустафа Паша во Скопје и започна со читање на Куранот.
По молитвата, муслиманите си честитаа со желби за добро здравје и благослов.
Поглаварот на ИВЗ, Шаќир Фетаи им честиташе на верниците, потсетувајќи дека овој празник симболизира солидарност, жртва и взаемна помош. Меѓу пораките кои што ги упати беше и пораката за спречување на миграцијата и заштита на семејството.
„Сите ние сме созданија на нашиот Творец, сите сме од еден татко и една мајка. Денеска најмногу ни е потребна искрена и чиста верба во семоќниот Алах, кој не обединува во потеклото и заедничката смисла на човечкото општество. Овој голем празник не поттикнува во нашите постапки предност да и дадеме на меѓусебната соработка и решавањето на предизвиците кои ги носи времето“, вели Шаќир Фетаи.
Курбан Бајрам е празник на жртвата која е најважна во Исламот. Се паѓа на десеттиот ден во месецот според Месечината Дуљ-Хиџе, а се однесува на исполнување на петтиот услов на Исламот, аџилакот.