Наскоро расправа за албанскиот јазик – Касами: Уставен не треба да се занимава со политички прашања

Се ближи денот кога Уставниот суд ќе расправа за законот за албанскиот јазик. Највисокиот орган во земјава за ТВ21 потврди дека за 20 март на дневен ред е ставен почетокот на консултативна седница со експерти од областа. Од ВРЕДИ велат дека законот не ги исполнува барањата на Албанците, но сепак треба да се спроведува таков каков што е. Биљал Касами од Движење Беса рече дека уставниот суд не треба да се занимава со политички прашања.

„Уставниот суд повеќе не треба да се занимава со политички прашања, секако дека законот како таков не одговара на барањата на Албанците, но мора да се спроведува. Сметаме дека Уставниот суд има и други многу важни прашања што мора да ги реши во однос на уставноста. Во оваа насока, доколку се разговара за Законот за јазиците, се надевам дека Уставниот суд ќе донесе одлуки во однос на неговото спроведување и дека овој закон ќе биде практичен во интерес на Албанците и другите заедници“, вели Биљал Касами.

Европскиот фронт упати повик да не се чепка албанскиот јазик. Пратеничката од албанската опозиција, Илире Даути, рече дека самиот факт да се остави отворено уставното прашање за Законот за употреба на јазиците, за неа претставува директна закана за Албанците да се чувствуваат несигурни во употребата на албанскиот јазик.

„Дека многу конкретни прашања не ги оставија на правдата, тоа веќе го докажаа, почнувајќи од сериозните прекршувања што ги направија, од Укинувањето на балансерот кој следуваше и со укинување на правото за да се декларира етничката припадност. Сето ова е напишано во програмата на ВМРО, затоа секој обид да се глуми дека овие прашања се препуштени на правдата се само неуспешни обиди бидејќи го докажаа спротивното“, вели Илире Даути.

На почетокот на декември минатата година се одржа првото рочиште во Уставниот суд на иницијатива на 13 субјекти, меѓу кои ЛЕВИЦА и ВМРО-ДПМНЕ, против Законот за албански јазик. Тој период беше проследен со протести организирани од Европскиот фронт, испраќајќи пораки да не се чепка овој закон, кој според нив беше еден од темелите на Рамковниот договор по конфликтот во 2001 година.