„Не знам кој беше иницијатор за грабнување, но тој муабет го почнуваше Велибор Манев“, рече Кешишев

Обвинетиот Влатко Кешишев, денеска дава исказ во судот на рочиште за грабнувањата и убиствата на Панче Жежовски и на Вања Ѓорчевска.

Кешишев кажа дека ги познава обвинетите, со исклучок на Александар Ѓорчевски, таткото на Вања за кого тврди го видел првпат во судница.

Кешишев изјави дека тој заедно со Манев ја копале дупката во Велес, но мислел дека барале злато, и не знаел за каква намена била истата.

На прашање на неговиот адвокат Дејан Ефремов, кој бил иницијатор на тема грабнување, Кешишев одговори:

„Слушнав разговараа на тема грабнување. На почетокот мислев се сериозни, но потоа поминаа две години и го сфатив тоа како фантазија. Не знам точно кој беше иницијатор на оваа идеја за грабнување, но тој муабет го почнуваше Велибор“, рече Кешишев.

Ефремов: Дали знаеш каде живее обвинетито Велибор Манев?

Кешишев: Да и имам одено во неговиот дом. Со Палчо имам одено 2-3 пати. Првиот пат беше за централен комитет во Велес. После бевме на славата кај него.

Ефремов: На снимките од камерите на куќата на Манев се гледа дека доаѓате со Велибор Манев, се гледа дека вие вадите еден ранец, може ли да го опишете ранецот по боја и дизајн и што имало во него?

Кешишев: Тој беше тегет, а внатре немав отворено не знам што имаше, бидејќи на Палчо беше и си го носеше со него. Јас не гледам во туѓи ствари и не сум радознал. Само ако ми каже или ако ми нареди…

Ефремов: Кој го стави ранецот во возилото?

Кешишев: Палчо го носеше и го стави кај мене меѓу нозе. Јас седев на совозачко седиште.

Ефремов: Може ли да кажете за што разговаравте таа вечер?

Кешишев: Зборувавме за Панче и како може да се дојде до неговата куќа. Кај Велибор за задржавме можеби пола саат. Потоа земавме токи-воки радио станици тројцата и тргнаа кон куќата на Панче. Мене ме оставија да го земам Кангуто. Мене не ми беше дадена моторола за комуникација. После пола саат тие се вратија и кажаа дека ништо не направиле. Палчо го зеде Кангуто и се вративме во партијата Десна во Скопје. После тоа имаше и втор обид за грабнување на Панче. Јас постојано седев во Реното Кангу, не излегував и чекав да се вратат. После еден час се вратија со колата на Панче и тогаш запаливме по една цигара и Палчо го фрли телефонот на Панче.

Ефремов: Која беше целта во разговорите за грабнувањето на Панче?

Кешишев: Целта беше за возило првично. Човек кој живее сам и кој нема многу пари, за да бидат полесни околностите.