„Нема мир без безбедност на жените“, „Несигурноста на жените е аларм за нас“ и „Ние не молчиме, не трпиме, до последниот здив се спротивставуваме“, беа дел од пораките на демонстрантите против насилството врз жените.
Колективот за феминистичка мисла и акција во петокот протестираше во Приштина, барајќи убиствата на жените да се третираат како „национална итност“. Голем број граѓани маршираа од плоштадот „Захир Пајазити“ до Владата на Косово.
Меѓу десетиците граѓани беа и членови на семејствата на жени убиени од нивните сопрузи, меѓу кои и семејството на последната жртва, Jетлира Фониќи, за која постои сомнение дека била убиена од нејзиниот сопруг пред четири дена.
Меѓу барањата на демонстрантите се создавање специјализирана единица за спречување на фемицидот на министерско ниво, институционална одговорност и функционализирање на институционалниот синџир за спречување на фемицидот, вклучително и Центрите за социјална работа.
Протестот се одржа по последните два случаи на убиства на жени, за кои постои сомнение дека биле извршени од нивните сопрузи. Само во текот на изминатата недела, имаше случај со 25-годишна бремена жена за чие убиство се сомничи нејзиниот 26-годишен сопруг, додека пред два дена имаше случај со 80-годишна жена за чие убиство се сомничи нејзиниот 81-годишен сопруг.
Според податоците на косовската полиција, презентирани од организаторите, од 2010 година до август 2026 година се регистрирани 63 жени како жртви на убиства во семејството.