Гимназијалците Албанци во Куманово и понатаму следат настава во некогашниот земјоделски комбинат, чии простории се приспособени за да служат како училиште. Бројни ветувања, а решение за гимназијата „Сами Фрашери“ и понатаму нема. Поранешниот министер за образование и наука и актуелен пратеник, Арбр Адеми пред две години за ТВ21 рече дека е обезбеден објект за гимназијата кај градската касарна, меѓутоа оттогаш работите тапкаат во место. Градоначалникот на Куманово, Максим Димитриевски ја демантира изјавата на Адеми. Вели дека побарал помош од министерот и Владата, но дека не добил никаков одговор. Димитриевски му порача на Адеми да биде поискрен кон граѓаните.
Со оглед на тоа што Владата и министрите за образование не ни одговорија, ние како општина ќе се позанимаваме со ова прашање, уверува Димитриевски.
Арбр Адеми пак, вели дека објектите на касарната се во сопственост на МОН и дека чекале општината да го направи Деталниот урбанистички план за да можат да се приспособат и да одговорат на потребите на едно училиште. Додава дека Димитриевски нема ниту проект, ниту техничка документација.
-Разните начкртани цртежи кои се прават за половина час не ја претставуваат техничката документација. Вие сте новинари и прашајте го градоначалникот на општина Куманово – дали ја поседува техничката документација што е прв чекор за финансирање на важен проект од страна на Владата. Нема ниту техничка документација, ниту проект. Доколку одбиваат… особено тој одбива да ја изготви техничката документација. Нека ја исполни својата обврска за промена на Деталниот урбанистички план и нека ја набави техничката документација, и самото реализирање на проектот ќе го преземе Владата, вели Адеми.
ТВ21 побара став и од сегашниот министер за образование, Јетон Шаќири, но не добивме повратен одговор. Последниот пат кога се произнесе во однос на ова прашање, ни рече дека ќе оствари средба со градоначалникот на Куманово. Општината неделава одржа средба, но и овојпат не беше донесена никаква конкретна одлука за гимназијата „Сами Фрашери“.