Легендарниот албум „Rubber Soul“ на The Beatles ќе добие проширено јубилејно реиздание на 2 октомври, кое, покрај новите аудио-верзии, ќе содржи и досега необјавена демо-снимка на Џон Ленон, објави музичкиот портал Њу Мјузик Едитор.
Изданието, кое го објавуваат UMG и Apple Corps Ltd, е ремиксирано од продуцентот Џајлс Мартин и инженерот Сем Окел. За првпат по повеќе од 60 години, албумот ќе биде достапен во нови стерео и Dolby Atmos миксови, заедно со оригиналната моно верзија и американското издание на Capitol Records.
Покрај оригиналните хитови како „Norwegian Wood (This Bird Has Flown)“, „Nowhere Man“, „Michelle“ и „In My Life“, реизданието ќе ги вклучи и синглот „Day Tripper / We Can Work It Out“, како и досега необјавени студиски снимки и домашни демо-материјали.
Најбогатото „супер делукс“ издание ќе содржи вкупно 68 песни распоредени на пет винил-плочи или четири компакт-дискови. Меѓу нив е и „Little Girl“, песна што Џон Ленон ја напишал и снимил како демо, но никогаш досега не била официјално објавена.
Пакетот ќе биде збогатен и со луксузна книга од 88 страници со нов вовед од Пол Макартни и предговор составен од архивски изјави на Џон Ленон.
„Rubber Soul“, снимен во октомври и ноември 1965 година, се смета за еден од највлијателните албуми на The Beatles и пресвртница во историјата на рок-музиката. Новите миксови се изработени директно од оригиналните четириканални мастер-снимки со помош на современа технологија за аудио-раздвојување развиена од WingNut Films Productions, студиото на режисерот Питер Џексон.