Стапката на невработеност во Велика Британија во тримесечниот период од февруари до април се зголеми од 4,5 проценти на 4,6 проценти, што е највисоко ниво од летото 2021 година, објави денес Британскиот завод за национална статистика (ONS).
Растот на платите, исто така, ослабе повеќе од очекуваното – годишниот раст на платите, без бонусите, во Велика Британија падна на 5,2 проценти, што е под прогнозите од 5,3 проценти.
Бројот на вработени на платен список во компаниите се намали за 109.000 само во мај, што е најголем месечен пад од пандемијата, додека бројот на огласи за работа се намали за 63.000 во претходните три месеци.
Канцеларијата за национална статистика истакнува дека компаниите сè повеќе ги одложуваат новите вработувања или не ги пополнуваат празните работни места, особено поради зголемувањето на трошоците за работна сила, објавува „Гардијан“.
Минималната плата во Велика Британија се зголеми за 6,7 проценти од април, а придонесите на работодавачите се зголемија, зголемувајќи ги трошоците за речиси милион компании во земјата.