Пакистанецот, обвинет за повредување на две лица со нож пред поранешните простории на „Шарли ебдо“, не знаел дека францускиот сатиричен магазин ги сменил канцелариите и сакал да ги запали, изјави денеска парискиот обвинител Жан-Франсоа Рикар.
Тој додаде дека осомничениот носел три шишиња запалива течност и избодел две лица претпоставувајќи дека се вработени во „Шарли ебдо“.
Според Рикар, осомничениот дејствувал под лажен идентитет и утврдено е дека има 25, а не 18 години, како што изјавил претходно.
Парискиот обвинител наведе и дека во телефонот на осомничениот пронајдено е триминутно видео на урду јазикот, во кој тој го најавува својот план: „Овде во Франција тие прават карикатури за нашиот чист и голем пророк Мухамед. Денеска… ќе се побунам против ова“.