Пентагон признава дека САД се соочиле со недостиг на муниција за време на воената операција против Иран, објавуваат повеќе американски и светски медиуми и агенции.
Во извештајот на генералниот инспектор на американскиот Департмент за одбрана објавен денеска, во кој е опфатен периодот од 1 април до 30 јуни, се наведува дека потребите за муниција за време на операцијата „Епик Фјури“ предизвикале намалување на стратешките резерви и ги откриле тешкотиите на индустријата во нивното повторно надополнување.
Пентагон соопшти дека презел мерки за брзо зголемување на производството. Сепак, ова е во спротивност со претходните изјави на администрацијата на Трамп, која ги негираше наводите за недостиг. Самиот американски претседстел претходно изјавуваше дека САД имаат „огромни количества“, па дури и „практично неограничени“ количества муниција.
Според американските медиуми, недостигот на муниција можеби бил една од причините поради кои Трамп не ги продолжил масовните напади врз Техеран во текот на летото.