Министерот за здравство, Азир Алиу, соопшти дека листата на есенцијални лекови не била ажурирана од 2015 година, а сега е изработена нова, модернизирана верзија, која има за цел да гарантира снабдување со критични терапии за јавното здравје и да го олесни покривањето на трошоците за граѓаните преку здравственото осигурување.
-Самото ажурирање е реализирано кон крајот на 2025 година во рамки на националната платформа за лекови, под раководство на Министерството за здравство, со поддршка на Светската здравствена организација и работната група, изјави Азир Алиу, министер за здравство.
Координаторот на работната група за ажурирање на листата, Зоран Стерјев, истакна дека листата ги вклучува најнеопходните лекови за лекување на најчестите заболувања, прилагодени на реалните потреби на населението.
-Она што е специфично и што треба да се напомене, според актуелните политики на Министерството за здравство, е дека во есенцијалната листа за првпат се вклучени терапии за замена на никотин, како што се трансдермални фластери и никотински гуми за џвакање. Понатаму, вклучено е и едно контрацептивно средство. Исто така, направена е реорганизација на антиинфективните лекови, при што е зголемен бројот на лекови против инфекции кои сега се дел од есенцијалната листа, изјави Зоран Стерјев, координатор на работната група.
Тој додаде дека есенцијалната листа се разликува од позитивната листа на лекови, бидејќи вклучува препарати кои државата треба да ги има обезбедено во секое време за граѓаните.