По повеќе од две децении чекање, новиот објект на средното училиште „Сами Фрашери“ во Куманово се очекува да биде пуштен во употреба во текот на 2027 година.
Портпаролката на Владата, Венера Латифи Азизи, соопшти дека за изградбата на училиштето се обезбедени 373 милиони денари. Главните градежни работи се завршени, а во моментов се изведуваат завршните работи на електричните и машинските инсталации.
Според соопштението, по завршувањето на овие работи и потребните процедури, новиот објект ќе биде ставен во функција во текот на следната година. Азизи рече дека изградбата на училиштето е дел од владините инвестиции во образовната инфраструктура, при што истакна дека Куманово е опфатено со проектите за јавни инвестиции.