Заедничкиот антитерористички тим на австралиската држава Викторија (JCTT) обвини и трет маж за подметнување пожар во синагогата „Адас Израел“ во Мелбурн во декември 2024 година.
Станува збор за 20-годишник од Аерпорт Вест, кој денеска беше обвинет додека се наоѓа во притвор поради други кривични дела. Тој се товари за кривично дело оштетување имот со пожар, за што е предвидена максимална казна од 15 години затвор, како и за однесување што загрозува човечки животи и кражба на моторно возило, за што може да добие до 10 години затвор, соопшти Полицијата на Викторија. Се очекува да се појави пред суд во Мелбурн следниот вторник, на 23 јуни.
Обвинети се сите тројца главни осомничени
Со ова обвинение, во рамки на операцијата „Хилфилд“, полицијата ја заврши истрагата против тројцата осомничени за кои се верува дека директно учествувале во провалата и подметнувањето на пожарот. Да потсетиме, во јули минатата година беше обвинет 21-годишник од Вериби, а во август и 20-годишник од Медоу Хајтс. Уште еден 20-годишник од Мелтон Саут минатата година беше обвинет за кражба на возилото кое било искористено во нападот.
Објавена снимка од нападот
Полицијата минатата година објави вознемирувачка снимка од безбедносни камери на која се гледаат тројца мажи како излегуваат од возило пред синагогата во раните утрински часови на 6 декември 2024 година.
На снимката се гледа како двајца маскирани напаѓачи истураат гориво од канистри во внатрешноста на синагогата во населбата Рипонли, по што ја запалуваат течноста.
Украден автомобил користен и во други напади
Истражителите утврдиле дека тројцата до синагогата пристигнале со украден син автомобил „Фолксваген Голф“ со фалсификувани регистарски таблички. Истото возило, кое полицијата го заплени минатата година, било користено и при подметнување пожар во ноќниот клуб „Лукс“ во Саут Јара во ноември 2024 година, како и при подметнување пожар и вооружен напад во Бундора истата ноќ кога била нападната синагогата.
Во врска со пожарот во ноќниот клуб „Лукс“, полицијата денеска уапси двајца мажи на возраст од 21 и 22 години.
„Нема индиции дека лицата уапсени денеска се директно поврзани со пожарот во синагогата, ниту дека пожарот во ноќниот клуб „Лукс“ бил политички мотивиран“, изјави портпарол на полицијата.
Постариот од двајцата подоцна беше обвинет, додека помладиот беше пуштен на слобода до завршување на понатамошната истрага.
Полицијата: Овие инциденти биле осмислени за да предизвикаат страв
Вршителот на должност помошник-комесар на Полицијата на Викторија, Пол О’Халоран, нагласи дека идентификувањето на одговорните за антисемитските напади и понатаму останува приоритет.
„Иако поминаа повеќе од 18 месеци од пожарот во синагогата „Адас Израел“, останавме цврсто фокусирани на тоа оние што ѝ нанесуваат штета на нашата заедница да бидат изведени пред лицето на правдата“, изјави О’Халоран.
„Јасно е дека овие инциденти биле осмислени за да предизвикаат страв и вознемиреност, додека луѓето од сите вери и потекла заслужуваат да се чувствуваат безбедно во нашата држава.“
Неговата колешка, помошник-комесарот Тес Волш, објасни дека истражителите веруваат оти украдениот „Голф“ бил користен во повеќе кривични дела, можеби од различни групи.
Таа ги повика граѓаните да се јават доколку кон крајот на 2024 година забележале некого како купува пет црвени канистри од по 20 литри или вкупно 100 литри бензин.
Помошник-комесарот на Австралиската федерална полиција, Стивен Нат, изјави дека истражителите веруваат дека „повеќе сторители биле директно и индиректно поврзани со подметнувањето на пожарот во синагогата“.
Тој додаде дека, иако нема индиции за вмешаност на неонацистички движења, случајот и понатаму се истражува како „политички мотивиран напад врз еврејската заедница“.
„Доколку целта на овој напад била да ја ослабне решителноста на еврејската заедница, мојот впечаток е дека тоа не успеало. На снимката од безбедносните камери што денес ја објавуваме ќе видите спротивно – кукавици кои ги кријат своите лица и напаѓаат верски објект“, рече Нат.
Помошник-комесарот Питер Крозиер додаде дека истрагата напредувала благодарение на помошта од заедницата, но и предупреди дека некои лица се обидуваат да ја попречат.
„Можеме да откриеме дека веруваме оти одредени поединци активно го лажеле JCTT, најверојатно во обид да ја попречат нашата истрага. Дозволете ми да бидам многу јасен – нема да ја попречите правдата. Сега е време да се јавите и да ја направите вистинската работа“, порача Крозиер.
Полицијата ги повика сите кои имаат какви било информации за случајот да се обратат до службата „Крајм Стоперс“ на бројот 1800 333 000 или преку нивната веб-страница. Може да се поднесе и доверлива пријава преку Националната телефонска линија за безбедност на бројот 1800 123 400.