Од рано утринава, жителите на Форинo се обидуваат да ја испумпаат водата од нивните куќи. Поплавите кои вчера го зафатија гостиварскиот регион предизвикаа големи штети во ова село.
„Ова е една од куќите во селото Форино. По поплавите од минатата ноќ, жителите се обидуваат со пумпи да ја испумпаат водата од подрумите и куќите. Ситуацијата е сериозна, а штетите во селото се значителни.“, вели новинарот на ТВ21, Сенат Зилбехари.
Жителите велат дека штетата е голема и дека не спиеле од страв дека надојдената вода може да им го загрози животот. Тие очекуваат општинските и државните институции да им помогнат и да ги надоместат предизвиканите штети.
„Може и сами да видите колкави се штетите. Многу се значителни, нивото на водата беше многу високо. Селото беше блокирано. Според информациите, проблемот е во Локовица. Таа ја испушти водата кон Балиндол и заврши во Форино, речиси половина од селото е поплавено, има многу штети“, велат жителите.
Прашање: Како поминавте?
До полноќ се обидувавме да ја испумпаме водата со пумпи, кофи и крпи. Кога се прекина струјата, се предадовме. Имаме многу штети, а нозете ни се смрзнаа од водата.
Немам коментар, не знам што да кажам. Ова е трагедија за луѓето, но тоа е трагедија во животот. Сè што можев да спасам се обидов, но не верувам дека успеав. Имаме многу штети, целиот кат е под вода. Како ќе се справиме? Многу е сериозно, бидејќи куќата ја имав изградено со многу труд.
Можете сами да видите, немам коментар. Вие видовте сами. Водата е половина метар внатре, сега ќе земам мотор да ја извлечам. Има мотор, но се изгуби, и вчера немавме струја, не знам како да го решиме тоа“, велат жителите.
Од Општина Гостивар известуваат дека е формиран кризен штаб и дека, со машините на општината и приватните компании, се обидуваат да им излезат во помош на жителите.
„Ние како општина, заедно со сите институции, бевме на терен и се обидовме на сите граѓани да им излеземе во помош. Најпогодени во Гостивар беа селата Форино, Локовица, Мало Турчане, и некои населби во градот. Како општина, со целата сила бевме во соработка со сите во оваа област, но најкритично беше селото Форино. Таму се трудевме со сите ресурси да им помогнеме на жителите.“, вели Сафет Асани од Општина Гостивар.
Според жителите на Форино, ваква поплава се случила само во 1979 година. Тие очекуваат општината да направи проценка на штетите.