Генералниот секретар на НАТО, Марк Руте, изјави дека бројни руски беспилотни летала го нарушиле полскиот воздушен простор синоќа, по што била активирана воздушната одбрана и биле ангажирани сојузниците на Алијансата.
„Нашата одбрана успешно ја обезбеди територијата на НАТО, точно онака како што беше замислена“, рече генералниот секретар.
Во операцијата учествуваа полски авиони Ф-16, холандски авиони Ф-35, италијански извидувачки авиони АВАКС, транспортни авиони со танкери на НАТО и германски системи Патриот. Тој особено ги пофали пилотите и сите што придонесоа за „брзиот и вешт одговор“.
Северноатлантскиот совет утрово одржа консултации согласно член 4 од Вашингтонскиот договор на барање на Варшава. Сојузниците изразија целосна солидарност со Полска и го осудија, како што беше нагласено, „крајно неодговорното и опасното однесување на Русија“. Проценката на штетата сè уште е во тек, но јасно е дека, според генералниот секретар, „ова не е изолиран случај“.
„Врховниот командант на сојузничките сили ќе продолжи да управува со нашите одбранбени капацитети долж целото источно крило. Сојузниците се решени да ја бранат секоја педа од територијата, а нашата одбрана останува во постојана готовност “, рече тој.