Најголемиот глобален хуманитарен настан за мотоциклисти, „The Distinguished Gentleman’s Ride“, оваа година го одбележува своето 11-то издание во Скопје, како дел од глобалното движење кое ги обединува љубителите на класичните мотоцикли и елегантниот стил со цел подигање на свеста за машкото здравје.
Според организаторите, денес се очекува повеќе од 220 „стилски облечени“ мотоциклисти да парадираат низ улиците на главниот град на своите класични мотоцикли, давајќи ѝ на активноста посебен шарм и визуелна привлечност.
Настанот, кој се одржува во Скопје од 2016 година, е дел од глобална иницијатива која досега собра над 60,5 милиони долари за борба против ракот на простата и подигање на свеста за менталното здравје на мажите. Над 340.000 луѓе во повеќе од 121 земја и 1.070 градови низ целиот свет учествуваа во ова движење. Скопското издание досега придонесе со над 24.000 долари.
Елегантните мотоцикли и посебниот изглед на учесниците остануваат препознатлив симбол на овој настан оваа година, промовирајќи ги главните цели на активноста – подигање на свеста кај машката популација и собирање средства за справување со сериозни здравствени и социјални предизвици.
„Џентлменс Кру Скопје“, организаторот на настанот, изрази благодарност до учесниците, партнерите и пријателите, кои, како што нагласуваат, придонесуваат за „The Distinguished Gentleman’s Ride – Skopje“ надминувајќи ги претходните резултати секоја година.