Вработените во Словенија и годинава имаат законско право на задолжителен зимски регрес, кој изнесува 740,94 евра, а работодавците треба да го исплатат најдоцна до 18 декември. Сумата е за 102,08 евра повисока од минатогодишната, што претставува зголемување од околу 16 проценти.
Зимскиот регрес е задолжителен за работодавците и во приватниот и во јавниот сектор. Неговата висина е утврдена на половина од минималната бруто-плата во Словенија, која годинава изнесува 1.481,88 евра. Компаниите можат да исплатат и повисок износ, а обврската не зависи од тоа дали работат со добивка или загуба.
Целосниот износ им следува на работниците кои биле вработени цела година со полно работно време. За оние кои работеле пократок период или биле ангажирани со скратено работно време, по правило се пресметува сразмерен дел. Исклучоци се предвидени за одредени категории работници кои имаат законско право на скратено работно време поради родителство, инвалидност или здравствени причини.
Правото на зимски регрес не се губи автоматски ниту при престанок на работниот однос пред декември. Доколку работникот ја сменил компанијата во текот на годината, секој работодавец е должен да го исплати делот што одговара на периодот во кој работникот бил вработен кај него. Боледувањето и породилното отсуство, исто така, сами по себе не се причина за губење на ова право.
Законската обврска предвидува исплатата да ја изврши работодавецот, а подароци и ваучери не можат да ја заменат. Одложување поради неликвидност е дозволено само ако таквата можност е предвидена со колективен договор на ниво на дејност, при што крајниот рок е 31 март 2027 година. Оваа можност не се однесува на јавниот сектор.
Зимскиот регрес е посебен надоместок, различен од регресот за годишен одмор и од наградата за деловна успешност. До законски утврдениот износ е ослободен од социјални придонеси, но даночното ослободување се пресметува заедно со евентуалната награда за деловна успешност, при што двете исплати го делат лимитот во висина на една просечна месечна плата во Словенија.
Обврската за исплата останува во сила и по одлуката на Уставниот суд, за која словенечките медиуми известија на 21 октомври. Судот утврдил неуставност во ретроактивната примена на дел од правилата за исплатата за 2025 година, но не го укинал самото право на зимски регрес.
Додека синдикатите ја поддржуваат мерката, од Занаетчиско-претприемачката комора на Словенија повторно се спротивставија на задолжителниот карактер на исплатата, оценувајќи дека божиќниот бонус треба да биде оставен на избор на работодавците.
За непочитување на законската обврска се предвидени глоби од 3.000 до 20.000 евра, додека за работодавците со најмногу десет вработени казните се движат од 1.500 до 8.000 евра. Прекршувањата може да се пријават во Инспекторатот за труд, вклучително и анонимно.
Задолжителниот зимски регрес во Словенија беше воведен во 2025 година, кога изнесуваше 638,86 евра. Претходно, компаниите можеле да исплаќаат божиќни награди, но тие не претставувале општо законско право за сите работници.