Градоначалникот на Град Скопје, Орце Ѓорѓиевски, најави дека во наредните денови ќе одржи средба со граѓаните во врска со нелегалниот пешачки премин кај Бит Пазар. Тој рече дека ќе го сослуша мислењето на граѓаните и, доколку мнозинството побара пешачки премин, ќе биде подготвен проект за уреден премин. Во спротивно, ако граѓаните побараат затворање, преминот ќе биде затворен. Ѓорѓиевски додаде дека на терен ќе излезе заедно со градоначалникот на Чаир, Изет Меџити, за одблиску да ги слушнат загриженоста и барањата на жителите.
Ѓорѓиевски говореше и за проектот на улицата „Цветан Димов“, посочувајќи дека Општина Чаир го подготвува проектот, додека Град Скопје веќе обезбедил средства во буџетот. Тој изјави дека очекува до крајот на годината да започне постапката за тендерирање за избор на компанија што ќе го реализира проектот. Ѓорѓиевски нагласи дека веќе започнале комуникации со сопствениците на објектите кои би можеле да бидат опфатени со процесот на експропријација и додаде дека од нивна страна постои позитивна подготвеност.
Инаку, завршувањето на проектот за „Цветан Димов“ се очекува да трае четири години. Предвидено е проектот да се реализира на потегот од крстосницата со „Никола Карев“ до крстосницата со „Џон Кенеди“.