Британскиот премиер Кир Стармер упати остро предупредување до големите технолошки компании, барајќи од нив да воведат механизми кои ќе ги спречат децата да испраќаат или примаат експлицитни фотографии. Во спротивно, Владата најавува нова законска регулатива во рок од неколку месеци.
Говорејќи на настанот London Tech Week, Стармер истакна дека компаниите кои работат во Велика Британија ќе мора да воведат контроли на самите уреди што ќе овозможат блокирање на голи или сексуално експлицитни содржини поврзани со малолетници.
„Оваа влада нема да стои настрана додека децата се изложени на ризици на интернет. Ги повикувам технолошките компании да воведат контроли кои ќе спречат децата да испраќаат и примаат експлицитни фотографии. Тоа не е невозможен предизвик“, изјави Стармер.
Според предложените мерки, компании како Apple и Google ќе треба да активираат или развијат алатки што ќе можат да откриваат и блокираат ваков вид содржини на паметни телефони и таблети. Возрасните корисници и понатаму би можеле да пристапуваат до експлицитни содржини преку системи за проверка на возраста.
Владата предупреди дека доколку компаниите не преземат конкретни чекори во рок од три месеци, може да следува законска интервенција, која би вклучувала парични казни, а како крајна мерка и можна кривична одговорност за раководните лица.
Мерките се дел од пошироката стратегија на британската влада за справување со онлајн ризиците за децата, вклучувајќи сексуално вознемирување, злоупотреба и изнуда преку интернет.
Британската министерка за внатрешни работи, Шабана Махмуд, нагласи дека целта е превенција на злоупотребите, а не зголемен надзор над граѓаните.
„Оваа технологија веќе постои на уредите. Компаниите само треба да ја активираат за да спречат децата да гледаат голи фотографии. Нема известување, собирање податоци, следење или испраќање на фотографии надвор од уредот“, рече таа.
Предлогот доби поддршка од организации за заштита на децата, меѓу кои и NSPCC, кои сметаат дека посилните заштитни механизми можат да спречат сериозни последици по младите.
Од друга страна, активистите за заштита на приватноста предупредуваат дека ваквите мерки би можеле да отворат простор за поголем надзор врз личните уреди. Организацијата Big Brother Watch оцени дека предлозите можат да доведат до навлегување во приватноста на корисниците.
Политичките реакции исто така се поделени. Лидерката на конзервативците Кеми Бејденок изрази сомнеж за практичната примена на мерките, додека заменичката лидерка на либералдемократите Дејзи Купер оцени дека владата предолго чекала да реагира.
Од Google соопштија дека веќе соработуваат со британските власти во изнаоѓање решенија кои ќе ја заштитат приватноста и истовремено ќе го ограничат ширењето на штетни содржини меѓу младите. Од Apple засега нема официјален коментар.