Тргнати шаторите пред Уставен – Османи: Ќе продолжиме со отпорот! Шаќири: Маката ви е за власт

Денот „Д“ за судбината на двојазичноста во земјава беше дочекан со протест пред Уставниот суд во Скопје. Граѓаните повикани од опозицискиот Европски фронт се собраа кај поставените шатори за да го изразат својот револт. Бројни полициски сили имаше и околу зградата на Уставен, но и кај Собранието. Претседателите на ДУИ Али Ахмети и АА Зијадин Села му порачаа на судот да не одлучува селективно.

„Се молам до небото, едностраните и селективни одлуки, овие луѓе кои се таму етнички да не носат повеќе погрешни и полоши одлуки бидејќи тоа не е добро за демократијата или соживотот, ниту помага за стабилни меѓуетнички односи“, вели Али Ахмети.

„Не можеме да се откажеме од јазикот на кој што нè научија нашите мајки, нашите родители, не се откажуваме од иднината на нашите деца, затоа што тоа е нашиот свет јазик, за кој во минатото се жртвуваа многу наши преродбеници“, вели Зијадин Села.

По одлуката на Уставниот суд за одржување подготвителна седница за иницијативата за оценување на уставноста и законитоста на Законот за употреба на јазиците, потпретседателот на ДУИ, Бујар Османи изјави дека е недозволиво највисокиот орган да одржува седница во моноетнички состав.

„Ние ќе продолжиме со отпорот, во одбранана јазикот, во различни форми. Најавуваме дека во моментот кога ќе се закаже седница за оценување на уставноста на законот за албанскиот јазик, ќе бидеме овде. Народот ќе биде овде. Не е само нашиот глас во заштита на албанскиот јазик, не е само албанската кауза. Тоа е кауза за заштита на мултиетничка европска РСМ“, порача Бујар Османи.

По овие ставови, од ЕФ одлучија да ги тргнат шаторите.

Од коалицијата ВРЕДИ рекоа дека нема да дозволат деградирање на албанскиот јазик. Пратеникто Ријад Шаќири рече дека албанскиот јазик нема да се чепка, како што се случи денеска, според него, албанскиот јазик уште повеќе ќе унапредува.

„Тие кои се кријат во шаторите и се штитат од дождот, ниту дождот ниту сенката на шаторите нема да го покријат срамот од нивните дела. Нивната врева нема врска ниту со албанскиот јазик, ниту со Албанците, со ништо албанско. Нивната врева не е за државата туку за власт, бидејќи им треба власта заради колективна амнезија од прогонот на правдата. Ќе положат сметка, нема каде да бегаат“, вели Ријад Шаќири.

Инаку од ЕФ соопштија дека кога ќе продолжи седницата во Уставен, тие повторно ќе излезат со шатори пред зградата на судот.