Турција, Пакистан, Египет и Саудиска Арабија ги осудија нападите на јеменските бунтовници Хути, поддржани од Иран, врз меѓународниот аеродром во Ријад.
Четирите земји ги оценија нападите како опасна ескалација што не може да се оправда или прифати под никакви околности, објави „Ројтерс“.
Саудиските власти соопштија дека едно лице загинало, а десетици биле повредени во нов напад врз меѓународниот аеродром во Ријад во неделата.
Нападот се случил еден ден откако во претходен напад, за кој одговорност презедоа Хутите, загинале 13 лица, а повеќе од 300 биле повредени.
Четирите регионални сили, познати како групата Р4, ја потврдија својата солидарност и поддршка за Саудиска Арабија. Тие се обврзаа целосно да ги поддржат сите легитимни мерки што Ријад ќе ги преземе за да одговори на нападите, да ги спречи заканите и да избегне нивно повторување.
Во заедничката изјава објавена во неделата, земјите од групата ги прогласија Хутите за целосно одговорни за последиците од нападите и за секое влијание што тие би можеле да го имаат врз регионалниот и меѓународниот мир и безбедност. Тие побараа нападите веднаш и безусловно да престанат.
Турција, членка на НАТО, и Пакистан, кој поседува нуклеарно оружје, во август потпишаа заеднички договор за одбрана со Саудиска Арабија. Според договорот, напад врз која било од страните се смета за напад врз сите нив.
Минатата недела, трите земји соопштија дека се согласиле да ги спроведат своите заеднички обврски во областа на одбраната и да обезбедат брзо распоредување воени сили и капацитети во Саудиска Арабија, во услови на континуираните напади на групата Хути.