Среда напладне! Зелениот пазар во Куманово речиси празен!
Оние малку што ги затекнавме рекоа дека купуваат само најосновни работи, жалејќи се дека цените станале неподносливи – и на овошје-зеленчук и на другите артикли.
„Многу скапо во однос на платите и пензиите, сѐ е поскапено! Без разлика – и овошје-зеленчук и лебот, нема ништо евтино. Имаме премногу вработени политичари и нивните гласачи што мораат некаде да земаат плата: те гласав, плати ме. Затоа страдаат овие што не се во политика, категориите што тешко се снаоѓаат на пазарот, младината – ја гледаш по кафетерии, само политичарите да живеат, останатите нека ‘умрат’.“
„Никогаш не прашувам за цени, тоа што е – не можам да направам пазар. Што да му кажам, може или не може?! Не вреди.
– Воопшто, како ти изгледаат цените според животниот стандард?
– Според стандардот се скапи, но и трговците треба да живеат.“
„Мислам дека е скапо! Цените се високи и на зеленчук и на овошје според платите и приходите на граѓаните. Една од причините е и недоволното производство од нашите земјоделци, несигурниот пласман, поскапувањето на суровините што ги користат – и ова е резултат на ситуацијата.“
Трговците велат дека цените се зголемени од големопродажба. Утрово на пазарот – познат како „Кванташки“ – килограм краставици се продавал за 150 денари. Некои велат дека во овој период овошјето и зеленчукот се увезуваат, главно од Турција и Грција, и како последица на транспортот и царинењето – растат и малопродажните цени.
„Цените се скапи генерално – зелката 30–40 ден/kg, пиперките 200 денари. Со оваа плата тука не може да се живее.
– Последниве денови кои производи најмногу се поскапени?
– Пиперките, бананите, еве јаболките 50–60 ден/kg, бананите 75.
– Дали влијаат и празниците?
– Да, влијаат, токму овие последните денови пред празниците се очекува цените уште да растат.“
Според Заводот за статистика, во ноември трошоците за живеење биле 4% повисоки од истиот месец лани, а индексот на малопродажни цени пораснал за 3%. Само во еден месец, од октомври до ноември, инфлацијата пораснала за 0,5%. Групата на храна и безалкохолни пијалаци бележи најголемо зголемување. Во ноември годинава, цените се повисоки за 5,4% во споредба со минатата година. Овошјето е поскапено за 18%, додека месото, маслата и мастите имаат цени над 7% повисоки. Најдрастичен раст има артиклите што зависат од светските берзи – кафето, чајот и какаото со 27%.