Занаетчиската организација од скопската чаршија реагира на фондацијата „Скопје 2028“ – се бара поширока застапеност, се најавува бојкот

Занаетчиската организација од Скопската Чаршија изрази загриженост за составот на раководните органи на Фондацијата „Скопје – Европска престолнина на културата 2028“, оценувајќи дека недостасува застапеност на Старата Чаршија во овој важен културен проект. Според јавната реакција, Скопје е мултикултурен град и секој проект што има за цел да го претстави неговиот идентитет треба да ги вклучи сите заедници и културни фактори. Занаетчиската организација, која претставува над 400 членови и над 1000 бизниси во Старата Чаршија, нагласува дека нивното исклучување од консултативните и одлучувачките процеси е занемарување на културното наследство на градот. Тие оценуваат дека Фондацијата треба да биде водена од личности со широка општествена доверба и кои ги претставуваат вредностите на вклученост и еднаквост. Тие бараат од Град Скопје и Фондацијата „Скопје 2028“ да го преиспитаат својот состав и институционален пристап. Паралелно, најавуваат дека доколку продолжи исклучувањето, ќе ги бојкотираат активностите на Фондацијата, нагласувајќи дека Скопската Чаршија ќе остане „европска со или без политизирани фондации“.