За време на рутинска контрола на граничниот премин Бухс, во кантонот Сент Гален, швајцарските царински власти заплениле 356.000 евра непријавени пари.
Според „Blick“, 50-годишен швајцарски државјанин, кој патувал со воз од Салцбург кон Цирих, првично изјавил дека не носи пари ниту багаж. Сепак, при контролата службениците пронашле торба скриена под седиштето, во која имало пет пликови и паричник со голема сума готовина.
По откривањето, мажот тврдел дека парите ги пренесувал за друго лице, но неговите објаснувања биле оценети како контрадикторни и недоверливи. Поради тоа, властите се посомневале на можно перење пари или финансирање нелегални активности.
Парите веднаш биле конфискувани, а случајот е предаден на кантоналната полиција во Сент Гален за понатамошна истрага.
Според швајцарскиот закон, не постои ограничување за носење готовина, но сумите над 10.000 швајцарски франци мора да бидат пријавени, а нивното потекло и намена да се оправдаат доколку тоа го побараат надлежните органи.