Над 500 кубни метри нелегално исечена дрвна маса се запленети во засилените акции на Шумската полиција спроведени низ државата во текот на септември и почетокот на октомври. Во истиот период биле поднесени 140 пријави, а привремено биле одземени и десетици возила и опрема поврзани со незаконската сеча и транспортот на дрва.
Во рамки на акциите биле одземени 13 товарни и 17 патнички возила, девет трактори, како и моторни пили, приколки, секири и други предмети користени за нелегална сеча и превоз на дрвна маса.
Засилените контроли се спроведуваат паралелно со редовните активности на Шумската полиција, со посебен фокус на подрачјата каде што е забележано поизразено дејствување на организирани групи на дрвокрадци. Целта е да се спречат незаконската сеча и нелегалното снабдување со дрва на домаќинствата и производствените капацитети, со што се нанесува значителна штета на шумскиот фонд.
„Засилените акции ќе продолжат и во наредниот период, на целата територија на државата. Заштитата на шумите е јавен интерес и наша институционална одговорност. Шумската полиција ја има целосната поддршка на Министерството да постапува одлучно и доследно против незаконската сеча, транспортот и трговијата со дрва, во рамките на своите законски овластувања“, изјави министерот за земјоделство, шумарство и водостопанство, Борче Серафимовски.
Во пресрет на грејната сезона, Министерството апелира до граѓаните огревното дрво да го купуваат исклучиво од лиценцирани продавачи и складови. Со набавката од легални извори се придонесува за сузбивање на нелегалната трговија и за зачувување на шумите.
Од Министерството ги повикуваат граѓаните да ги пријавуваат сомнежите за незаконска сеча, транспорт и продажба на дрва до Шумската полиција и другите надлежни институции.