Денес во Брисел започнува клучната вонредна средба на лидерите на 27-те земји-членки на ЕУ. Две се главните теми – итно зајакнување на европската одбрана и поддршката за Украина во контекст на прекинот на воената помош од Вашингтон.
Иако може да се постигне консензус по првата тема, втората – за Украина, очекувано ќе предизвика разлики во ставовите.
Како може да се развие денот денес во Брисел и што кажа Емануел Макрон во обраќањето до нацијата, со кое го заврши вчерашниот ден? Веднаш по обраќањето на Макрон до нацијата, тој се сретна со унгарскиот премиер Виктор Орбан.
Така еден од иницијаторите на европскиот план за спасување на Украина се сретна со неговиот најголем противник.
Пред тоа, Емануел Макрон објави дека до 2030 година Франција ќе го удвои својот буџет за армијата. А следната недела во Париз ќе се соберат претседателите на државите зад коалицијата кои ја поддржуваат Украина. Според зборовите на францускиот претседател, иднината на Европа не треба да се решава во Вашингтон.
Никој не знае што ќе се случи денес во Брисел. Веројатно по првата важна тема – итно и моќно зајакнување на европската одбрана, европските лидери ќе постигнат единство.
Веќе има повеќе детали од каде ќе дојдат парите за одбрана – тие 800 милијарди евра, колку што е буџетот на ЕУ за повеќе од две години. 150 милијарди евра објави претседателката на Европската комисија Урсула фон дер Лајен за заеднички набавки. ЕК ќе ја искористи својата тежина за да позајми средства под најповолни услови, а потоа повторно ќе ги даде како заеми на државите-членки. Овие пари ќе мора да се враќаат.
За останатите 650 милијарди евра, ЕК се потпира на зголемувањето на трошоците за одбрана на државите-членки. За да имаат мотив да го направат тоа, ЕК ги отстранува овие трошоци од строгите правила и ограничувања на европскиот буџет. Потврдено е дека украинскиот претседател Володимир Зеленски исто така ќе присуствува на состанокот во Брисел.