По три години на функцијата, американската амбасадорка во Северна Македонија, Анџела П. Агелер, објави дека ја напушта земјата, истакнувајќи ја големата чест и привилегија што ја имала да ја претставува САД.
Во своето обраќање, амбасадорката ја потенцираше силната доверба во храброста и потенцијалот на народот на Северна Македонија, истакнувајќи дека заедничката работа во последните три години донела конкретни резултати во области како економски раст, енергетска независност, судска реформа, инфраструктура, образование, културна заштита и евроатлантска интеграција.
„Во овие три години, нашето партнерство прерасна во вистинско и длабоко пријателство со многу од вас кои ги сретнав низ целата земја. Ме пречекавте во вашите училишта, цркви, судници, во вашите домови, на фармите и винариите“, истакна Агелер, додавајќи дека ја ценела отвореноста на граѓаните и споделените приказни, визии и соништа за земјата.
Амбасадорката ја потенцираше и соработката на ниво на НАТО, инфраструктурни проекти како отварање на стратешките коридори 8 и 10, борбата против корупцијата, развојот на ретки земјини минерали, сајбер-безбедност и одговорно управување со животната средина.
„САД секогаш ќе бидат покрај вас, верувајќи во сонот за посилна, поблагосостојна, побезбедна и целосно интегрирана евро-атлантска партнерка и сојузник“, порача Агелер во своето обраќање.
Агелер е меѓу амбасадорите кои се повлечени или се сменети од страна на администрацијата на претседателот Доналд Трамп.