Ако ви е дијагностициран преддијабетес или дијабетес, или некој од вашето семејство страда од оваа состојба, треба да бидете внимателни. Управувањето со шеќерот во крвта е процес кој започнува со правење здрави избори, особено кога станува збор за храната што ја јадеме.
Но, тоа е само еден дел од загатката. Заедно со урамнотежена исхрана, управување со стресот и избегнување на пушење, истражувањата покажаа дека редовното вежбање, дури и со краток и низок интензитет, може да има значително влијание врз намалувањето на шеќерот во крвта.
Според извештајот објавен во списанието Sports Medicine, пешачењето две до пет минути веднаш по оброкот може да го намали ризикот од дијабетес тип 2 помагајќи да се контролира нивото на шеќер во крвта.
Пешачењето му помага на шеќерот во крвта да се зголемува и опаѓа со постепено темпо
Овој извештај е направен со разгледување на седум различни студии за да се утврди како прекинувањето на продолженото седење, било со стоење или со кратка прошетка, може да влијае на нивото на шеќер во крвта и инсулинот кај една личност. На повеќето од учесниците во студијата не им бил дијагностициран преддијабетес или дијабетес.
Она што научниците го открија е дека пешачењето две до пет минути по половина час седење помага нивото на шеќер во крвта да се зголемува и опаѓа со постепено темпо.
„Пешачењето или вежбањето може да ви помогнат да го намалите шеќерот во крвта по оброкот“, вели диететичарот Ејми Гудсон, истакнувајќи дека кардиоваскуларното вежбање може да има долготрајно дејство, што значи дека ги прави вашите клетки почувствителни на апсорпција на шеќер во крвта 24 до 48 часа после тоа.
Тоа не значи дека можеме да јадеме што сакаме
Откритието е ветувачко бидејќи многу луѓе мислат дека треба да вежбаат долго или напорно за да го одржат нивото на шеќер во крвта ниско. Само неколку минути пешачење после оброк и повремени кратки паузи од седењето може да имаат значително влијание на шеќерот во крвта, а со тоа и на целокупното здравје.
Се разбира, тоа не значи дека можете да јадете што сакате. На крајот на краиштата, најдобриот начин да го контролирате е да јадете помали и почести оброци кои содржат јаглени хидрати и протеини богати со влакна.