Турскиот претседател Реџеп Таип Ердоган ја претстави визијата на Партијата на правдата и развојот (АКП) за следните 25 години, во својот говор по повод 25-годишнината од основањето на партијата.
Јубилејот беше одбележан со голем митинг во паркот „Милет Бахчеси“ во Анкара, на кој присуствуваа повеќе од 100.000 луѓе.
„Почнуваме одново. Ова движење, овој тим, овие млади луѓе, нивните деца и внуци прво ќе ја однесат Турција до 2053 година, а потоа до 2071 година. Јас ќе продолжам да се трудам да ѝ служам на Турција. Ќе продолжам да работам за Турција со истата љубов и страст“, изјави Ердоган.
Годините што ги спомна Ердоган не се избрани случајно. Во 2053 година ќе се одбележат 600 години од османлиското освојување на Константинопол, додека во 2071 година ќе се навршат 1.000 години од победата на Турците Селџуци над Византиската Империја во битката кај Маназгирт. Турскиот претседател ги посочи овие годишнини и како рокови за остварување на различни цели во развојот на турската држава и нација.
Ердоган ја претстави визијата на АКП, која, според него, е документ од 69 страници во кој се утврдени приоритетите на партијата за следниот четврт век.
„Со визијата што ја споделуваме денес, на нашата 25-годишнина, ќе продолжиме да ги претвораме соништата во цели, а целите во реалност“, рече тој.
Визијата опфаќа 10 области, меѓу кои производство со висока додадена вредност, дигитален суверенитет, судскиот систем, нов устав, семејни и социјални политики, положбата на жените и младите, како и зелената транзиција. Ердоган посебно се осврна на владината иницијатива „Турција без тероризам“, оценувајќи дека земјата се движи кон решавање на проблем што повеќе од 40 години предизвикува десетици илјади жртви.
Турскиот претседател, кој веќе 25 години е неприкосновен лидер на АКП, рече дека поминал 50 години во политиката и дека има намера да остане активен. „Ако Бог ми даде здравје и долг живот, ќе продолжам со љубов да ѝ служам на Турција и на мојот народ уште многу години“, рече тој.
За време на настанот, тројца опозициски пратеници и седум градоначалници ѝ се приклучија на АКП, а Ердоган лично им ги стави партиските ознаки.
АКП е основана на 14 август 2001 година, а на парламентарните избори во 2002 година стана владејачка партија, позиција што ја задржа до денес.