Дотраените главни цевки за водоснабдување на штипските населби, кои се од десната страна на реката Отиња се причина за големиот дефект и сувите чешми, изјави на денешната прес-конференција директорот на ЈП „Исар“, Здравко Коцев.
Очекува дека овој голем дефект ќе се санира за неколку часа, а вчера без вода за пиење остави поголем дел од жителите на градот Штип. Појаснува дека дефектот е откриен, вчера околу 18 часот, кога од штипската Филтер станица почнало да се дистрибуираат неверојатни 600 литри во секудна. Тоа им било аларм за голем дефект, а неколку часа им било потребно да го најдат низ непристапниот терен.
-Кога го пронајдовме, тука имаше распукнато цевки, кои се стари повеќе од 50 години, што значи дека ова е толку многу дотраено, што веќе мора и да се замени. Потрошувачката на вода беше толку многу голема, 600 литри во секунда, со што за кратко време Филтер станица се испразни и со други зборови не можеше да го снабдува градот со вода за пиење, вели Коцев.
Апелира граѓаните да се трпеливи, бидејќи станува збор за голем дефект, а екипите работат на негово санирање. Откако ќе завршат постепено ќе се пушта водата до населбите, со цел да не се појават и други проблеми во водоводната мрежа. Штипското комунално претпријатие „Исар“, со цистерна обезбедува техничка вода за жителите од населбите, кои останаат без вода за пиење.