Во Основниот кривичен суд Скопје започна судењето против Стојанче Јовановски, обвинет за семејно насилство, телесна повреда, загрозување на сигурноста и наведување на самоубиство на сопругата Ивана Јовановска, која во март скокна од шести кат заедно со нивната шестгодишна ќерка Катја.
Обвинетиот се изјасни дека е виновен за телесна повреда и загрозување на сигурноста, но ја негира вината за најтешкото дело.
„Не ја натерав сопругата да си го одземе животот“, изјави Јовановски пред судот.
Според обвинителството, тој подолг период ја малтретирал сопругата психички и физички, а на 2 март ѝ упатувал закани и ја нападнал на повеќе локации во Скопје.
На судењето сведочеше и мајката на жртвата, Љубица Стојаноска, која изјави дека ќерка ѝ често имала модринки, но тврдела дека паднала.
„Се сомневав дека е тепана, ама Ивана не ми признаваше. ‘Ќе биде мамо во ред’, ми велеше“, рече таа пред судот.
Судењето продолжува со изведување докази и сослушување сведоци.