Злоупотребата на службената положба на Катица Јанева обвинителството ја докажува со наводна снимка на која се гледаат 50.000 евра како стојат на маса во домот на Катица Јанева, а која пак ја снимал Бојан Јовановски.
„Факт е дека поранешната колешка примила пари 50.000 евра од Бојан Јовановски, што е апсолутно недозволиво за било кој обвинител. Не смее да прими подарок мислам над 50 евра. Воопшто не е битно дали тие потекнуваат од брачната двојка Камчеви или од друго лице. Таа примила пари што е недозволиво. Убаво се гледа на пачката од банката и износот“, посочи Вилма Рускоска.
За одбраната и самата Катица Јанева ова е искреиран и конструиран настан, додаваат дека обвинителството нема никакви докази и очекуваат само ослободителна пресуда.
„По однос на пачката, прво по однос на фотографијата апсолутно не постои никаков доказ како е направена, дали е тоа валидна, дали нешто не е монтирано, апсолутно не знаеме што има на масата, дали се тоа пари , се знае како се оценува дали нешто е пари , по пат на вештачење и искрено да ви кажам не знам како ги преброи јавниот обвинител тие пари“, истакна Ирена Фрчкоска.
За Катица Јанева е апсурдно што таа девет месеци е во притвор, а Кичеец кој е веќе осуден првостепно се наоѓа на слобода.
„Оваа постапка е монтирана, не само против мене, туку и против целото СЈО. Одговорно тврдам дека никогаш не сум понудила на Камчев олеснување на положбата во било кој предмет на СЈО. Милевски излезе од притвор на слобода и тоа не се смета за злоупотреба во овој случај, а јас без никакви докази веќе девет месеци со во притвор“, истакна Катица Јанева.
Јанева за прв пат во судница проговори и за пријателството со сега првообвинетиот Бојан Јовановски. Рече дека никогаш не разговарале за предметите на СЈО, туку теми на разговор им биле мода, домашни миленици и семејството.
Екс-специјалната обвинителка потенцираше дека таа ќе биде првата и последна личност која обвинила функционер, па ги запраша присутните во судницата доколку за тоа треба да одговара и ако така дошла правдата во Македонија ќе го стори и тоа.
Боки 13 најави политичка кариера и побара од судот да се обраќа до јавноста преку писмо од судот, а полемизирајќи со обвинителката Вилма Рускоска рече дека тој е следниот лидер на вистинска европска Македонија, надминувајќи го и претседателот на СФРЈ, Јосип Броз Тито.