Секој ден, Палестинците во Газа трчаат во смртоносна борба со надеж дека ќе добијат храна.
Израелските војници отвораат баражи од огнено оружје кон толпите што минуваат низ воените зони за да дојдат до помош, а крадци вооружени со ножеви чекаат да ги нападнат оние што ќе успеат. Палестинците велат дека беззаконието расте додека се принудени да влегуваат во смртоносна трка за да ги прехранат своите семејства.
Среќници успеваат да обезбедат неколку пакетчиња леќа или кеса брашно. Многумина се враќаат со празни раце и мора да се обидат повторно со искушението следниот ден.
„Влегувате на улиците за да стигнете пред луѓето, до точката на смртта како што јас го нарекувам тоа, го нарекувам точката на смртта, тенкот е пред нас, митралезот е пред нас, а квадрокоптерот е над нас, а на земја има војници со снајпери, се пука во секој што ќе се помести пред време, и во моментот кога тенкот ќе се повлече, ние почнуваме да трчаме, долго растојание, околу 600 метри, трчаме од местото каде што сме за да донесеме помош“, изјави Омар Ал-Хоби, раселен Палестинец.
Палестински сведоци велат дека војниците пукаат за да спречат толпите да се движат покрај одредена точка пред да се отворат центрите или затоа што луѓето го напуштаат патот одреден од војската. Тие опишуваат силни баражи од тенкови, снајперисти, беспилотни летала.
-Не можев ништо да донесам, бидејќи носат едноставни работи и ги ставаат на тесно место и сите луѓе се еден врз друг, луѓето се убиваат едни со други и умираат и се тепаат со ножеви, а таму има многу бандити, ме нападна со нож и се вратив, а исто така и Американците прскаат гас што гори, ги заслепува очите и стануваш неспособен да гледаш, ова не е мало страдање низ кое поминуваме, ова е неправда, изјави Џамил Атили, раселен Палестинец.
Израел почна да дозволува внесување храна во Газа минатиот месец, откако целосно ја прекина на 10 недели испораката на хуманитарна помош. Обединетите нации велат дека тоа не е доволно за да се спречи гладувањето на Палестинците во Појасот Газа.
Илјадници луѓе мора да пешачат километри за да стигнат до центрите за храна, од кои три се на крајниот југ надвор од градот Рафа. Палестинците велат дека опасноста започнува кога толпите влегуваат во израелската воена зона што ја опфаќа Рафа.