Општина Чаир денеска ќе го отвори новото издание на традиционалната манифестација „Културно лето Чаир 2026“, која ќе трае еден месец и ќе понуди богат програм посветен на културата, уметноста и традицијата.
Отворањето ќе биде означено со тридневната програма „Денови на децата“, која ќе се одржува од 1 до 3 јуни на неколку локации – во Старата скопска чаршија, на плоштадот „Скендербег“ и во дворот на џамијата „Мурат Паша“.
Програмата започнува на 1 јуни во 17:00 часот со свечена парада на ученици од основните училишта во Чаир, облечени во традиционални носии и со транспаренти на своите училишта. Колоната ќе се движи од „Зегин“, преку Старата чаршија, до плоштадот „Скендербег“, каде потоа ќе се одржи културно-уметничка програма.
Во следните денови се планирани низа настапи на ученици, културно-уметнички друштва и детски групи, вклучувајќи песни, ора, рецитации, драматизации и изложби на детски ликовни творби.