Светската здравствена организација во четвртокот соопшти дека се идентификувани осум случаи на хантавирус – меѓу кои три потврдени инфекции и пет сомнителни случаи – кај лица поврзани со крузерот „MV Hondius“, додека здравствените власти во повеќе земји се обидуваат да го следат и ограничат ширењето на инфекцијата.
Бродот, на кој сè уште се наоѓаат дел од патниците, се движи кон Канарските Острови во Шпанија, каде неговото пристигнување се следи со зголемено внимание.
Двајца патници во сериозна состојба, кои биле евакуирани од бродот, пристигнале во Холандија на лекување, соопшти во четвртокот компанијата „Oceanwide Expeditions“. Трет евакуиран патник, кој според компанијата моментално нема симптоми, исто така добива медицинска нега во таа земја.
Евакуираните патници се британски државјанин, 65-годишен Германец и 41-годишен холандски член на екипажот.
Тројца луѓе – холандска двојка и германски државјанин – починале откако бродот минатиот месец отпловил од Аргентина.
Портпарол на холандската влада за CNN изјавил дека жена отишла во болница во Амстердам на тестирање по можна изложеност поврзана со бродот. Холандските медиуми објавија дека таа е член на екипажот на авио-компанијата KLM и дека имала контакт со 69-годишна Холанѓанка која починала во Јужна Африка минатиот месец.
Епидемијата е поврзана со андескиот сој на хантавирус, редок, но потенцијално тежок вирус кој во одредени случаи може да се пренесува меѓу луѓе преку близок контакт.
Здравствените власти во Јужна Африка соопштиле дека лабораториски тестови го потврдиле андескиот сој кај два потврдени случаи поврзани со бродот, додека истрагата за контактите продолжува, јави Reuters.
Во средата, директорот на СЗО Тедрос Аданом Гебрејесус изјавил дека еден патник кој се вратил во Швајцарија по напуштањето на бродот бил позитивен и се лекува во Цирих.
„Пациентот одговорил на е-пошта од операторот на бродот со која патниците биле информирани за здравствениот настан“, изјавил тој.
Во Обединетото Кралство, Агенцијата за здравствена безбедност соопштила дека двајца британски државјани кои порано го напуштиле бродот се во домашна изолација како мерка на претпазливост.
Во САД, здравствените власти следат три лица кои исто така се вратиле дома по напуштањето на бродот. Во сојузната држава Џорџија, две лица се под надзор без симптоми, додека во Аризона едно лице исто така нема симптоми. Според MedPageToday, други американски патници се вратиле во Тексас и Вирџинија.
Ситуацијата привлече меѓународно внимание бидејќи патниците се расеале во повеќе земји пред целосно да се разбере епидемијата, што доведе до споредби со почетокот на пандемијата на Ковид-19. Сепак, здравствените власти нагласуваат дека нема докази за широко распространет ризик од пренос.
СЗО соопштила дека соработува со засегнатите земји за меѓународно следење на контактите, со цел да се надгледуваат потенцијално изложените лица и да се спречи понатамошно ширење на болеста.
Во меѓувреме, Канарските Острови се подготвуваат да ги примат преостанатите патници од „MV Hondius“ викендов.
По предупредувањата од пристанишните работници на Тенерифе дека не добиле јасни упатства за приемот на бродот и заштитните мерки, властите на Канарските Острови соопштиле дека бродот ќе остане закотвен на отворено море, наместо да влезе во пристаниште. Патниците ќе бидат префрлени во обезбедена зона во пристаништето, а потоа директно на аеродром за репатријација.
Бродот се очекува да пристигне на Тенерифе во недела, соопштила министерката за здравство Моника Гарсија.