Еден од организаторите на студентскиот протест, Мевљан Адеми, во емисијата Клик Плус го повтори ставот за целосна примена на Законот за употреба на јазиците. Според него, барањата на студентите треба да се темелат на актуелниот закон и нема потреба од комисии или нови посебни процедури за албанскиот јазик.
„Апелирам да се спроведе Законот за употреба на јазиците, онака како што е. Секое отстапување од тоа, секој нов закон што не е усогласен со овој закон, нè враќа назад. Ние можеме да имаме 10 испити за студентите кои студираат на македонски јазик, но за тие 10 испити нема да правиме 10 нови комисии и 10 нови закони. Треба да се најде решение кое ќе се базира на Законот за употреба на јазиците во секое наше барање што ќе го доставиме, само да се темели на актуелниот закон“, изјави Мевљан Адеми, организатор на студентскиот протест.
Студентот Члирим Исени изјави дека по првиот протест се соочиле и со други проблеми, со што нивната кауза дополнително се проширила.
„Што се однесува до пораката, ние сме образувани на албански јазик и сакаме правосудниот испит да го полагаме на албански јазик. Но сега прашањето се прошири, каузата се прошири затоа што од првиот протест наваму се соочивме со различни проблеми што дополнително ја проширија оваа кауза, и денес на вториот протест излеговме со таа цел – нашето главно барање беше целосната примена на албанскиот јазик“, изјави Члирим Исени, студент.
За студентката Хава Насуфи, поддршката што ја добиле студентите од нивните колеги и јавни личности од земјава, но и од Албанија, Косово и дијаспората им дала сила да продолжат со нивната кауза сè до целосно исполнување на барањата.
„Поддршката беше исклучително голема, особено за овој протест добивме поддршка што остава без зборови. Не само од студентите, туку и од познати личности, од општеството во Северна Македонија, Албанија, Косово и од сите Албанци каде и да се. Во име на сите студенти им благодариме за поддршката затоа што ни дадоа уште поголема сила да продолжиме напред и да ја доведеме оваа наша мисија до крај и да не се откажеме“, изјави Хава Насуфи, студентка.
Студентите изразија оптимизам дека овој проблем ќе добие решение, најавувајќи дека ќе продолжат да го креваат својот глас и за нивните колеги од другите насоки, сè додека албанскиот јазик не биде почитуван во сите институции во државата.