Нов пресврт во односите меѓу Вашингтон и Техеран се наѕира по спротивставените изјави од двете страни за состојбата во Ормускиот Теснец. Додека американскиот претседател Доналд Трамп тврди дека нема никакви преговори со Иран и дека теснецот е отворен, од Техеран велат дека неговото повторно отворање е условено со исполнување на конкретни барања од САД.
Трамп преку својата платформа Truth Social порача дека во моментов нема преговори, ниту договорени средби меѓу Вашингтон и Техеран. Тој истакна дека поморската блокада продолжува, но дека Ормускиот Теснец е „отворен и функционален“.
Американскиот претседател додаде дека сите морски мини во областа биле отстранети или уништени.
Од друга страна, иранскиот главен преговарач Мохамад Багер Калибаф изјавил за иранските државни медиуми дека Теснецот ќе остане затворен сè додека САД не ги исполнат условите од привремениот договор постигнат во јуни.
Калибаф пред иранскиот парламент ги навел барањата на Техеран. Меѓу нив се укинување на американската блокада на иранските пристаништа, повлекување на санкциите врз иранската нафта, одмрзнување на иранскиот имот, како и прекин на воените закани и операции на сите фронтови.
Така, Вашингтон и Техеран засега испраќаат целосно спротивставени пораки за состојбата во стратешки важниот Ормуски Теснец. Трамп тврди дека тој е отворен и функционален, додека Иран условува негово отворање со исполнување на конкретни барања од американската страна.