Американскиот претседател Доналд Трамп изјави дека САД би можеле да го прогласат Ормускиот Теснец за „територија на Соединетите Американски Држави“, во нова закана кон Иран, додека преговорите за ставање крај на конфликтот меѓу двете земји остануваат во застој.
За време на говорот во полициска академија на Лонг Ајленд, Њујорк, во петокот, Трамп изјави дека „многу наскоро“ би можел да преземе таков чекор, бидејќи, според него, Иран е поразен.
„Откако ќе завршиме со поразувањето на Иран, кој многу лошо е поразен, многу наскоро ќе го прогласиме Ормускиот Теснец за територија на Соединетите Американски Држави“, изјави американскиот претседател.
Трамп додаде дека САД воспоставиле блокада и дека, според него, ниту еден брод нема да може да помине низ овој морски пат доколку Вашингтон не го дозволи тоа.
Сепак, не е јасно дали изјавата на Трамп претставува конкретна промена на американската политика или станува збор за закана изнесена во рамките на притисокот врз Техеран.
Заменик-министерот за надворешни работи на Иран, Казем Гарибабади, реагираше на социјалната мрежа „Икс“, изјавувајќи дека Иран нема да биде заплашен од американските закани или демонстрации на сила. Според него, одлуката за отворање или затворање на Ормускиот Теснец останува во надлежност на Иран.
Во меѓувреме, иранскиот министер за надворешни работи Абас Арагчи изјави дека Техеран не донел одлука за повторно започнување преговори со Вашингтон. Тој појасни дека пораките разменети преку Катар и Пакистан не претставуваат директни преговори.
Ормускиот Теснец е една од најстратешките точки за поморскиот транспорт во светот. Низ него вообичаено поминува околу една петтина од глобалните количества нафта што се транспортираат по морски пат.
Теснецот се наоѓа меѓу Иран и Оман и има огромно значење за меѓународните енергетски пазари.
Конфликтот доведе до значително зголемување на цените на горивата.
Трамп ја бранеше својата политика, оценувајќи дека зголемувањето на цените на горивата е трошок што Американците треба да го поднесат во рамките на напорите да се спречи Иран да се здобие со нуклеарно оружје.