Цената покачена, но Спасовски вели не е многу – до крај на година мора да имате нови лични документи со Северна Македонија

До крајот на 2023 година, секој граѓанин треба да има нови лични документи со името Северна Македонија. Министерот за внатрешни работи Оливер Спасовски вели дека ова важи и за тие граѓании чии документи сè уште важат.

Новото име граѓаните ќе ги чини повеќе, бидејќи цената за вадење документи е покачена, а на министерот Спасовски цената не му изгледа многу висока.

Некои граѓани кои ги анкетиравме велат дека почнале да ги менуваат документите но ваквата процедура велат дека е дополнителен товар. Пензионерите се пожалија за високата цена за лична карта и пасош.

-Дали сметате дека е скапо вадењето документи?
-Отворија многу дупки, за 400 денари е поскапено вадењето пасош.
-Со 12 илјади денари пензија што да правиме, за документи и други работи, а другата половина од месецот што да правиме. Но што да правиме, тоа е, сакале или не.

За лична карта треба да се плати 310 денари, значи покачувањето е 120 денари. Возачка дозвола ќе чини 410 денари, што е за 130 денари поскапо. Цената за пасош за едно лице до 27 години останува 1500 денари, а за над 27 години ќе изнесува 2000 денари. Измени во цената ќе има и за итна постапка. Пасош со итна постапка ќе чини 6100 денари, односно покачувањето е 1600 денари, а возачка дозвола ќе чини 1239 денари, односно со покачување од 390 денари.