ВМРО-ДПМНЕ ќе го блокира законот за амнестија – Ковачевски: Ќе има амандман ако се опфати и „Монструм“

ВМРО-ДПМНЕ ќе го блокира законот за амнестија предложен од министерот за правда Кренар Лога, најави во Клик плус првиот човек на ВМРО-ДПМНЕ Христијан Мицкоски. Причината зошто не го поддржуваат законот ја објасни со тоа што има десетици кривични дела кои не треба да се амнестираат, иако таков сличен закон предложиле во 2018 година во Собранието заедно со другите партии.

Законот нема да добие поддршка ниту од Демократски сојуз на Павле Трајанов. Бараат законот веднаш да се повлече бидејќи се прави за политички пазарења и се убедени дека овој закон нема да помине.

„Повеќе од јасно е дека сето ова, како и најавите за дополнителни амнестии се прави наводно за да се изгласаат уставните измени со кои се предлага Бугарите да бидат вградени во Уставот, а суштината е неказнивост на функционерите  и да се остане ден повеќе на власт“, вели ДС.

Премиерот Димитар Ковачевски не планира повлекување на законот туку преку амандмани да се смени истиот со цел да не се амнестираат двајцата осудени за случајот Монструм, Хаки и Фејзи Азири.

Меѓутоа министерот за правда Кренар Лога вчера рече дека законот е ист како тој во 2018, а истиот го предложила пратеничката група на ВМРО-ДПМНЕ и на СДСМ како и другите партии во земјава.

За 10 дена се очекува законот за амнестија да влезе во собраниска процедура, а министерот Лога очекува поддршка од сите пратеници бидејќи тврди дека ова не се прави за политички цели туку за ослободување простор во затворите.